Tímarit um raunvísindi og stærðfræði

Frá ritstjórn

Tímarit um raunvísindi og stærðfræði er gefið út af fjórum fræðafélögum, Íslenska stærðfræðafélaginu, Eðlisfræðifélagi Íslands, Efnafræðifélagi Íslands og Stjarnvísindafélagi Íslands. Markmið þess er að efla áhuga á raunvísindum og stærðfræði á Íslandi.

Ritið er bæði vefrit og hefðbundið prentað tímarit. Fyrst um sinn verður prentaða útgáfan send félagsmönnum allra félaganna, öllum skólum og bókasöfnum landsins. Vefútgáfan verður öllum opin.

Í ritinu mun birtast blandað efni og verður því skipt í fjóra meginflokka:

• Vísindagreinar fyrir fjölfróða og forvitna, skrifaðar fyrir þá sem eru læsir á vísindi en eru ekki sérfræðingar á viðkomandi sviði.
• Greinar um vísindi, samantektir skrifaðar fyrir almenning.
• Stuttar greinar og fréttir af rannsóknum í raunvísindum og stærðfræði.
• Vísindagreinar á viðkomandi fræðasviðum.

Tímaritið er ætlað áhugamönnum og sérfræðingum á þessum fræðasviðum, ekki síst kennurum og nemendum í þessum greinum. Tímaritið getur örvað umræðu um stöðu þessara greina í skólakerfinu og aukið áhuga á þeim en þörf er á slíku hér á landi.

Stefna ritstjórnar er að birta fjölbreytilegt efni á öllum fræðasviðum félaganna. Má þar nefna almennar greinar um vísindi og samfélag, sögu vísindanna, fréttir af rannsóknum, nýleg verðlaun, óleyst vandamál, frægar tilgátur, kennslumál, áhugavert efni sem kennarar hafa hnotið um í starfi sínu, kynningar á nýlegum meistara- og doktorsverkefnum, yfirlitsgreinar um einstök fræðasvið, rannsóknaniðurstöður o.s.frv. Allar vísindagreinar verða ritrýndar faglega af tiltækum sérfræðingum. Greinar eiga að öllu jöfnu að vera á íslensku með samantekt á ensku.

Stefnt er að því að gefa út að minnsta kosti tvö hefti á hverju ári. Fyrsta hefti 2003 inniheldur blandað efni á öllum fræðasviðum félaganna. Annað hefti 2003 inniheldur greinar með efni fyrirlestra sem haldnir voru á fyrstu ráðstefnu Stærðfræðafélagsins haustið 2001 í Reykholti í Borgarfirði. Fyrirhugað er að fyrsta hefti 2004 innihaldi blandað efni, annað hefti 2004 innihaldi efni fyrirlestra ráðstefnu Efnafræðifélagsins á Akureyri haustið 2002 og að þriðja hefti 2004 innihaldi efni fyrirlestra á ráðstefnu Stærðfræðafélagsins á Akureyri haustið 2003.

Ritstjórn tímaritsins skipa fjórir menn:

• Ari Ólafsson frá Eðlisfræðifélaginu ario@raunvis.hi.is
  
• Gunnlaugur Björnsson frá Stjarnvísindafélaginu gulli@raunvis.hi.is
  
• Rögnvaldur Möller frá Stærðfræðafélaginu roggi@raunvis.hi.is
  
• Ingvar Árnason frá Efnafræðifélaginu ingvara@raunvis.hi.is

Ritnefnd annast faglegt mat á innsendum greinum. Hana skipa auk ritstjóranna:

• Jón Tómas Guðmundsson og Lárus Thorlacius, frá Eðlisfræðifélaginu
• Ágúst Kvaran og Baldur Símonarson, frá Efnafræðifélaginu
• Ragnar Sigurðsson, Jón I. Magnússon og Sven Þ. Sigurðsson, frá Stærðfræðafélaginu

Ritstjórar velja úr sínum hópi formann ritstjórnar til tveggja ára í senn og er hann jafnframt formaður ritnefndar. Hann er ábyrgur fyrir útgáfu ritsins og samræmir vinnu ritstjórnar. Formaður ritstjórnar er Ari Ólafsson.

Félögin hafa hlotið rausnarlega styrki frá Almanakssjóði, menntamálaráðuneyti og Íslandsbanka til þess að hefja útgáfuna og kynna ritið.