Tímarit um raunvísindi og stærðfræði

Friðrik Diego

Móttekið: 15. júní 2002 - Vefútgáfa: 19. nóvember 2003

Ágrip

Stærðfræði er umfangsmest allra námsgreina í grunnskólum, að íslensku einni undanskilinni. Stærðfræðinám verðandi grunnskólakennara í grunnnámi við Kennaraháskóla Íslands hefur á hinn bóginn yfirleitt ekki verið sérlega umfangsmikið. Þó hlutur stærðfræði í grunnskólum fari vaxandi er ekki sömu sögu að segja af stærðfræði í framhaldsskólum og sú stærðfræði sem tilvonandi grunnskólakennarar hafa úr framhaldsskóla fer vafalítið minnkandi. Aðsókn að stærðfræðinámi á háskólastigi hefur löngum verið dræm hér á landi og það bitnar á stærðfræðikennslu í öllu skólakerfinu.

Þeir þrír skólar sem sinna kennaramenntun hafa í vissum tilvikum staðið saman að stærðfræðinámi fyrir grunnskólakennara og þeir hafa fjallað sameiginlega um stærðfræði í kennaranámi eins og sjá má í skýrslum sem frá þessu greina.

Nýverið hafa orðið töluverðar breytingar á fyrirkomulagi stærðfræðikennslu í Kennaraháskóla Íslands. Skyldubundið stærðfræðinám hefur aukist lítillega og einingafjöldi á kjörsviðum, þar á meðal stærðfræðikjörsviði, hefur aukist. Á sviði yngri barna kennslu eru nú sérstök námskeið sem fjalla um stærðfræðinám og í framhaldsdeild hefur nýlega verið sett á fót námsbraut í stærðfræðimenntun. Segja má að allar séu þessar breytingar skref í rétta átt, þó sum séu harla lítil. Frá þessum skipulagsbreytingum er nánar greint hér á eftir.

sækja grein (pdf) [raust.is/2003/2/18/]