Tímarit um raunvísindi og stærðfræði

Kristín Bjarnadóttir

Móttekið: 15. júní 2002 - Vefútgáfa: 18. október 2003

Ágrip

Árið 1996 hófst undirbúningur að gerð aðalnámskráa fyrir grunnskóla og framhaldsskóla á vegum menntamálaráðuneytisins. Samdar voru námskrár sem hvíldu á sameiginlegum þverfaglegum þáttum fyrir allar kennslugreinar. Áður hafði starfað nefnd á vegum ráðuneytisins til að koma með tillögur um hvernig efla megi námsgreinina stærðfræði og stærðfræðiáhuga nemenda í skólakerfinu. Nefndin, sem fékk stöðu forvinnuhóps í stærðfræði í námskrárgerðinni, skilaði tillögum sínum árið 1997. Starfshópar um námskrár í stærðfræði fyrir bæði skólastigin unnu úr tillögum forvinnuhópsins og luku þeir verki sínu árið 1999. Námskráin tók gildi sama ár. Sömu stefnumið eru sett fram fyrir bæði skólastigin. Skipan námskránna var einnig sameiginleg fyrir bæði skólastigin. Í greininni eru rakin lokamarkmið náms í stærðfræði á náttúrufræðibraut, greint frá almennri skipan stærðfræðináms í framhaldsskólum og tekin dæmi um einstakar áfangalýsingar sem settar eru fram sem deilimarkmið. Að lokum eru rakin helstu álitamál, sem eru m.a.~hvar greina skuli milli námsefnis náttúrufræðibrautar og annarra brauta, röðun efnis í áfanga, notkun reiknitækja, verkefnavinna og stærðfræðinám fyrir alla. Ennfremur er rætt um nauðsyn þess að halda uppi umræðu um námskrár og hlut stærðfræðináms í almennri menntun.

sækja grein (pdf) [raust.is/2003/2/17/]